President wa Uganda era omuduumizi w'eggye lya UPDF general Yoweri Kaguta Museveni atenderezza omulimu amakula ogukolebwa mutabani we era omuduumi w'eggye lye ggwanga general Muhoozi Kainerugaba okulwanyisa enguzi  mu UPDF, agambye nti kiyambye kinene okulongoosa embeera abasaasi b'eggwanga mwebawangaalira.

General Museveni abadde ku ttendekero ly'amagye erya Uganda Millitary Academy Kabamba mu district ye Mubende.

Abadde akulembeddemu omukolo ogw'okutikkira abajaasi 280 abatendekeddwa era nebegatta ku ggye lya UPDF.

Kuliko 187 ba professional cadets abatendekeddwa mu bukugu obwenjawulo,  87 bafunye degree mubyokwerinda ebaweereddwa Makerere University, 06 baatendekerwa mu mu mawanga g'rbunaayira okuli India ne Bungereza okubadde ne  Ruhamya Kainerugaba 
mutabani wa Gen.Muhoozi Kainerugaba 


Minister w'ebyokwerinda mu ggwanga Nsumikambi Mugambe Kiryowa Kiwanuka abuulidde president Museveni nti mu kiseera kino UPDF etunuulidde okwongera ku muwendo gw'amagye  agalina amagezi eg'ekikugu ekinaabayamba okumalawo ebbula ly'abakozi mu ggye lino n'asaba ba offisa abajja okukuuma ekifaananyi ekituufu ekya UPDF.


Omuduumizi w'eggye ly'eggwanga General Muhoozi Kainerugaba ategeezezza  omukulembeze w'eggwanga nti UPDF efubye okuyambako okukuuma emirembe mu mawanga agaliraanye Uganda.

Muhoozi agamba nti bamanyi bulungi obumenyi bw'amateeka naddala obutemu bwebijambiya obukyagaanye okuggwawo mu Uganda kyokka n'ategeeza nti bakola butaweera byonna okubirinnya ku nfeete.


Akulira ettendekero ly'amagye erya Uganda Military Academy Kabamba,  Brigadier General Ssaadi Katemba asinzidde mu kutikkira bannamagye bano, naagamba nti nga bakolera wamu ne Makerere University, UPDF yakwongera okutendeka abajaasi abalina obukugu mu bintu ebyenjawulo n'asaba mukamaawe ayambeko mukwongera okulongoosa empeereza mu matendekero ga UPDF gonna. 

Bisakiddwa: James Kaana Ssebuguzi