Enkumi n'enkumi z'abakungubazi zetabye mu kuziika abadde Omuyimbi ow'erinnya era omukommonsi w'omulere Moses Matovu amannyiddwa nga  Papa Moi era omu kubaatandikawo Afrigo Band mu 1974.

Moses Matovu yattiddwa mu Market Zone e Kibuli mu Kampala, nga 24 September,2026, ku myaka 77 egy'obuiulu, ng'aziikiddwa ku kiggya kya bajjajaabe e Kyanja mu Kampala.


Jjaja w`Obusiramu mu ggwanga Omulangira Kasiku Nakibinge, asinzidde mu kuziika kuno neyebeeza ebitongole ebikuuma ddembe olw`Obwangu obwakozeseddwa mu kukwata ateberezebwa okutemula Moses Matovu.

Omulangira Kakungulu ayogedde ku mugenzi ng'omuntu abadde ow'empisa, omukkakkamu era nga muntu mulamu.

Super Supreme Mufti wa Uganda Sheikh Muhammad Shaban Galabuzi, asabye banabitone ab'amannya okulabira ku mugenzi abadde omusajja ategulumiza ate era ayagala ennyo Katonda we.


Minister Avunanyizibwa ku bakozi ba government Gen. Edward Katumba Wanala atenderezza nnyo Moses Matovu olw`omukululo gwalese  mu kisaawe ky`Okuyimba, era namwogerako ng`omusajja abadde omuntumulamu, okukozi ennyo, agagaliiza era akuuma obudde.


Omuddumiizi w'eggye ly'eggwanga erya UPDF mu bubaka bwe bwatisse Minister wa Kampala Hajjat Minsa Kabanda, omugenzi amwogeddeko ng'abadde omuntu owenjawulo mu mirimu gyakola era eggwanga lifiriiddwa nnyo..

Racheal Magoola yayogedde ku lwa Afrigo Band, agambye nti Moses Matovu abadde wanjawulo nnyo nga ddala alinga muzadde gyebali, era nga buli muntu amuwuliriramu.


Omuyimbi Miseasch Ssemakula nga yayogedde ku lwa bannabitone abasajja, naye obubaka bwe abutambulizza ku kwebaza abantu bonna abababereddewo mu kiseera kino ekitali kyangu.


Aisha Matovu nga yayogedde ku lwabamulekwa bonna, yeebaziiza nnyo abantu abababereddewo mu kaseera kano ak'ekibwatukira.

Edrisa Musuuza Kenzo nga yayogedde ku lw'ekibiina ekigatta abayimbi, omugenzi ne Afrigo Band yonna okutwaliza aboogeddeko ng'ababadde abazadde, ababaleze mu kisaawe kinno eky`okuyimba.

Mariam Ndagire agambye nti Moses Matovu aleze abaana bangi mu kusaawe ky`okuyimba, nti era abadde muzadde eri banabitone bangi.

Roterian Micheal Kennedy Ssebalu nga yayogedde ku lwa Rotary Club mu ggwanga, agambye nti ku kwenkolagana yabwe n`omugenzi, bo nga aba Rotary beyamye okukwasizaako aba Afrigo Band abasigaddewo, okukakaasa nga Band eno esigala ng`egenda mu maaso.

Bisakiddwa: Musisi John