Kyadakiika omutendesi wa club ya KCCA, Brian Ssenyondo, afunye ku buwereero KCCA bwefunye obuwanguzi obusookedde ddala mu Uganda Premier League season eno 2026/27.

Club ya KCCA okufuna obuwanguzi obusoose erumye n'ogwengulu okuwangula club ya Kataka goolo 1-0, mu mupiira oguzanyiddwa mu kisaawe kya MTN Omondi Stadium e Lugogo mu Kampala. 

KCCA FC omupiira guno egwefuze n'ebitindu 62% ate Kataka ne bitundu 38%, nga goolo ewanguzza KCCA omupiira guno eteebeddwa Emmanuel Anyama mu dakiika eya 57.

KCCA ekubye ebizungirizi 12 ku goolo ya Kataka, ebizungirizi 5 bye bibadde mu mimwa gya goolo.

 Kataka ekubye ebizungirizi ku goolo ya KCCA 7, nga 4 bye bibadde mu mimwa gya goolo.

Omutendesi wa KCCA FC, Brian Ssenyondo abadde mu kaseera kazibu ddala olw'omutindo ogw'ekiboggwe KCCA FC gwetandikiddeko season, ng'emipiira 3 egyasoose yakubiddwamu 2, namaliri ga mupiira gumu. 

Omupiira omulala oguzanyiddwa, Police FC erumbye Lugazi omwayo mu kisaawe e Najjembe n'egikubirayo goolo 2-0. 

Goolo eziwanguza Police FC ziteebeddwa Richard Matovu mu dakiika eye 69 ne Ramsey Jjemba mu ddakiika eye 89.

 Mbarara City egudde maliri ne Entebbe UPPC 0-0 mu kisaawe e Rwamwanja e Kamwenge. 

Bisakiddwa: Isah Kimbugwe