Ababaka abatuula ku kakiiko ka parliament akavunanyizibwa ku by'obuzimbi n'entambula kasazeewo okugenda ku kitebe kya police e Naguru, okwetegereza engeri  number plates zino gyezirondolwamu n'okuketta entambula z'ebudduka (tracking) okuli emmotoka ne pikipiki, okulaba engeri gyebayinza okumalawo okwemulugunya okuva mu bavuzi b'ebidduka mu ggwanga, ku nkola ya number plates empya eza digital,  zebagamba nti tezikola kwosa nengaba yaazo eyakasoobo ate nga zabuseere.

Bino bikkaanyiziddwako  mu nsisinkano akakiiko gyekabaddemu ne minister ow'obutebenkevu Major Gen Jim Muhwezi, omuteesiteesi omukulu mu ministry y'ensonga z'omukulembeze w'eggwnaga Haji Yunusu Kakande, minister omubeezi owebyentambula Julius Maganda, Abakungu mu police ne ministry y'ebyentambula okwongera okumanya ebikwata ku kkampuni eyaweebwa omulimu ogwokukola n'okulondoola number plates eya Global security, Intergrated Transport Management system (ITMS). 

Ababaka okubadde owa Bukoto central Richard Sebamala nabalala, babuuzizza ensonga ebalemesa okulondoola ebidduka obulungi, ensimbi enyinjji ezibinikibwa abetaaga number plates, ng'ate enteekateeka eno yatekebwamu ensimbi mpitirivu mu ntandikwa.

Okusinziira ku kamisiona avunanayizibwa ku bidduka mu ministry y'ebyentambula Winston Katushabe akakasizza ababaka nti ddala wabaddewo akasoobo mukugaba number plates zino, olw'okuba nga zikolebwa mu kasoobo,  wabula nagamba nti kati bongedde okukisalira amagezi.

Minister w'obutebenkevu Major Gen Jim Muhwezi ategezezza ababaka nti entegeka yatunuulira nyo okukuuma obutebenkevu okusinga okukola amagoba, ng'abasinga bwebabadde beemulugunya.

Ababaka bamutadde ku nninga okubanyonyola kyebasinziirako okuteeka omuwendo gwa sente za number plate zino ku Shs714,300 gwe bagamba nti guli waggulu.


Mu ngeri yeemu Abakungu okuva mu police bategezezza nga bwebakozesa camera zoku nguudo n'obuuma obulimu technology obuketta mu number plates zino, ngera basobodde okulondoola n'okukwata emmotoka ne pikipiki eziwerako mu bitundu ebyenjawulo ezibeera ziriko omutawaana,

Mumbeera eno Ssentebe w'akakiiko ka parliament Mwine Mpaka agamba bakwesuula mu ddene balambuule ebifo ewakolebwa number plates nejjebazilondolera balabe obuzibu webuva, olwo balyoke baweeko amagezi ku birina okukolebwa okutereeza omulimu.

Bisakiddwa; Nabagereka Edithie