Olukiiko lwqa Uganda oluteekateeka empaka z'omupiira gw'ebigere eza Africa 2027 (Local Organizing Committee) (LOC), lukakasizza nti kampuni n'ebitongole 650, ku kampuni 850, ezaataddemu okusaba kwazo, okubaako emirimu egivaamu ensimbi gyezikola Uganda bwenaaba ekyazizza empaka za AFCON PAMOJA  2027.

Ssentebe w'olukiiko lw'empaka za Afcon mu Uganda, era nga ye mwogezi wa ministry yebyenjigiriza n'emizanyo, Dr Dennis Mugimba, asinzidde ku ssengejjero lyamawulire ga government mu Kampala, naategeeza nti kampuni n'ebitongole  200 ebitaabadde na bisaanyizo  nti bikyalinawo omukisa ssinga bitereeza obumulumulu obubulaayo ku byeetago.

Agambye nti n'olukiiko olw'okuntikko olutwala omupiira mu Africa olwa CAF, nalwo luliko byerwetaaga mu bantu abalina obusobozi okugenda ku mutimbagano gwa CAF nebasabayo emirimu gy'okuwereza mu kiseera kya AFCON PAMOJA 2027.

Empaka za AFCON PAMOJA  zigenda kutegekebwa amawanga 3 okuli Uganda, Kenya ne Tanzania, era zaakubawo mu January w'omwaka ogujja 2027.

Dr Mugimba agambye nti ebisaawe ebinene 3 byebitunuuliddwa mu kuteekateeka empaka zino, mu Uganda okuli ekye Namboole ekimanyiddwa nga Mandera National Stadium, Hoima City Stadium ne Akibua Stadium ekisangibwa mu bukiika kkono bwa Uganda.

Dr Mugimba era ategeezezza nti ebisaawe bino 3, binatera okujibwako engalo ,ng'ekya Hoima City nti kyali kiwedde wabula newabaawo ebyetagisa ebirala CAF byeyasaba era nabyo bikoleddwa era kituuse ku bitundu 95%, ate ekya Akiibua stadium kiri ku bitundu 80%, sso nga ne Namboole enaatera okuggwa.

Agambye nti enteekateeka zeebisawo bino zirina okujjibwako engalo nga olwa 31 December,2026 terunayita.

Waliwo neebisaawe ebirala 9 ebiteekebwateekebwa nga bino abazanyi baakubikozesa okweteekateeka okukoleramu dduyiro era nti nabyo bizimbibwa.

Dr. Mugimba agambye nti obuwumbi 135 n'obukadde 700 zezaabadde zeetagibwa okuzimba ebisaae bino 9, era nti ensimbi government yazibawadde okukola omulimu ogwetaagisa okweteekateeka obulungi, zaakwasiddwa UPDF Engineering department. 

Bisakiddwa: Ddungu Davis